नाईक साहेबेरी विचार वाटेती जायेमाच समाजेरो भलो छ.
===========================
फुलसिंग जाधव , औरंगाबाद
औरंगाबाद, महाराष्ट्र राज्य
अज्ञान, रुढी परंपराम फसे फसायो, जन्मजात गुन्हेगार ठरायेवाळ अमानवीय कायदेर बळी पडोपडाय हमारो समाज भारत स्वतंत्र वेयर बाद बी अनेक वातेती वंचित रेगो. स्वातंत्र्य मळेर बाद बी गुन्हेगारच वेतोे आन आज बी कायदेती गुन्हेगारच छ. स्वातंत्र्य मळेर बाद प्रारंभिक काळेमा कोरी कोरीउर देखन आपणे समाजेम शिक्षणेबद्दल हळीया हळीया जागरुकता बढती गी . समाजेन स्थिरता न रेयर कारण शिक्षणेम खंड पडतो गो . भटकंती चालू रेयर बाद बी वेला केलाती हमार लोक शिक्षण लेयेन लगगे.समाज आधारहीन वेतो . आसे काळेमा वसंतराव नाईक साहेब मुख्यमंत्री विये . ओ मुख्यमंत्री वेयर कारण समाजेन मोठो आधार मळो. आपणे पकोडाम जतरा ताकद वेती ओ ताकददेन आजी बळ मळो . समाजेन नवीन ऊर्जा मळी , बळ मळो . नाईक साहेबेर माध्यमेती समाजेन जगाडेवाळ एक निःस्वार्थ समाजसुधारक लोकुर फळी तयार वियी. नाईक साहेब घटनार १६(४) आधार लेताणी समाजेन आधार देयरो मोठो काम किदे. समाजे मांईरो अशिक्षितपणो दूर करेसारु डुंगर - खोळाम आश्रमशाळा, वस्तिगृह सुरु किदे. समाजेन सशक्त बणायेसारु, मारो समाज सन्मानित जीवण जगणु करन शिक्षणेन महत्व देताणी गोरमाटीऊन बलाबलान नोकरी तो दिनेच ओर शिवाय आश्रमशाळा , वस्तिगृह दिने. कॉलेजेम शिक्षण लेयेवाळ विद्यार्थीसारु शिष्यवृती सुरु किदे.शिष्यवृती मळेर कारण ओ काळेर हमार समाजेर विद्यार्थी तांडो छोडन मोठे शहरेम जायेन लगगे. शिकन नोकरीन लागते गे. जे नोकरीन लागते गे . उनुर बालबच्च्यान शिकेसारु आछो वातावरण मळतो गो . समाजे मांईरो अंधारो दूर वेतो गो . नाईक साहेबेर पुण्याईती आज एसी, भारी भारीर गाडी , बंगला मळायरो सौभाग्य हमारे समाजेन मळो. ई सत्य कुण नाकार सकछ ! पण ई सत्य नाकारेवाळ औलादे बी समाजेम पैदा वेगीछ. ई समाजेरो सेती मोठो दुर्भाग्य छ.
महाराष्ट्र राज्येम आपणे समाजेम शिक्षण क्रांतीन वेग आयरो काळ ई नाईक साहेबेरोच काळ वेतो. *नाईक साहेबेरे काळेमा आश्रमशाळा , वस्तिगृह सुरु न वेते , कॉलेजेम शिकेवाळ विद्यार्थीउन शिष्यवृती न मळती तो ५०- ५५ सालेर आंगेर हमार समाजेर पीढी कोनी शिकती. आन ई ५०- ५५ सालेर आंगेर पीढी न शिकती तो , उनुर बालबच्च्या कोनी शिकते. उनुर बालबच्च्या न शिकते तो हमार लोक मंत्रालयम नोकरीन कोनी लागते , ना कोई वेगवेगळे क्षेत्रेम आपण झलक वताते, ना कोई विदेशेम जान शिक्षण लेते, ना कोई नोकरी करते, ना कोई कुंवारे हिंडते, ना कोई भोग लगावते फरते ,ना कोई धर्म काढते फरते , ना कोई हाम पुरोगामी छा करन केते, ना कोई खासदार , आमदार, मंत्री रेते. ई सारी पुण्याई नाईक साहेबेर छ. ई कोई न भुलेन चाये. उनुर पुण्याईती हमार समाजेर हजारो कोनी तो लाखो लोक आज वेगवेगळे क्षेत्रेम काम कररे छ. उनुर कारणेती डॉक्टर, इंजीनियर, अधिकारी, प्राध्यापक, शिक्षक, वकिल, न्यायधीश, पोलीस, कारकुन, संस्थाचालक , राजकारणी, समाजकारणी, उद्योजक, बुद्धिजीवी, विचारवंत, लेखक, कवी, कलाकार, खेळाडू बणे. नाईक साहेबे कारण समाजेम जागृती आयी. उनुर कारण समाजेर अस्मिता , सन्मान जाग्रत वियो. समाज ताठ मानेती,स्वाभिमानेती, सन्मानेती जगेरो शिको.* *महाराष्ट्र राज्यम हमार वट फक्त नाईक साहेबे कारण छ.*
ई सूर्य प्रकाशेनाई सत्य रेयर बाद बी हमार समाजेर कांयी लोक नाईक साहेबेर बाबतीमा समाजेमा गैरसमज पसरायरो काम लारेर कांयी सालेती नियोजन पद्धतीती कररेछ. नाईक साहेबेर विचारधारापर चर्चा करतुवणा ये विकृत लोकुपर बोलणो आवश्यक वाटछ.
नाईक साहेब जाणनबुजन हमनेन ST म घालो कोनी. आसो खोटो अपप्रचार ये लोक सतत कररेच. संविधान बणायेवाळ आपणेन उचित न्याय न देयर बाद बी आपण सेर इज्जत कराछा. संविधानेर १६(४) नुसार मळेवाळी सवलती आज सेनच मळरीछ. पण आपणो विचार संविधान बणावतु कोनी वियोछ ई सत्य सुद्धा आपण दुर्लक्ष कर दिनेछा. डॉ. बाबासाहेब हमनेन मतेरो अधिकार बी न देयेन चाये करन साइमन कमीशनेसमोर केमेलेछ तरीही आपण उनुन मानाचा , उनुरो सन्मान ,आदर कराछा. पच नाईक साहेब उनुर आवाकामा जे वेतो ऊ हामनेन दिनो. उ न देतो तो हामनेन बरकायेन जागा वेती. पण ओ ई देयर बाद बी ST र सवलतीसारु प्रयत्न किदे.पण उनुन राजकीय विरोधके कारण उनुन यश मळो कोनी. जगजीवनराम आणि आदिवासी खासदार आड न आवते तो आपणेन न्याय मळजातो. पण दुर्दैवेती ई वात घडी कोनी. करन नाईक साहेबेन दोषी ठरावणु चुकीरो छ. ये मुद्दान लेताणी समाजेमा नाईक साहेबेबद्दल खोडसाळपणेती उनुर अप्रतिष्ठा विये आसो विषारी अपप्रचार करणु निश्चितच पुरुषार्थ प्रकट करे सरीख वात छेनी. आज हमारो समाज हारोभरो छ . उ फक्त आणि फक्त नाईक साहेबे कारण. कोई मूर्ख लोक भले ही ई सत्य नाकारते विये तो उ उनुरी सडी हुई बुद्धिरो भाग छ.
जे लोकुन वाटछ की ई प्रश्न सहज छुटे सरीखो छ, तो नाईक साहेबेन जाताणी आज चाळीस साल वेते आवरेच तो ये लोक पुढाकार लेताणी का कोनी हाई प्रश्न छडाये ? चाळीस साल नाईक साहेबेन दोष देयमा का आयुष्य वाया घाले ? प्रश्न ई छ की, ओच ओच वाते उगाळेती साध्य कांयी वेयेवाळो छ ? विशेष कतो नाईक साहेबेन बदनाम करन ये लोकुन राष्ट्रपती किंवा पंतप्रधान बी कोई करेवाळ छेनी. पच कसेन गोबर खायेरो धंदो करेरो ? येर पर केयर कतो जे लोक नाईक साहेबेन दोष दछ येनुर लायकी आन पात्रता तरी कांयी छ ? जरा ये लोक उनुर बापदादा न पुछेन चाये की, नाईक साहेबेर आंगेर आपण अवस्था कस वेती आन आज कस छ ?
नाईक साहेब हामनेन जे दिनो छ उ न मळतो तो आज हमार अवस्था कांयी रेती ? येरो विचार का न वेयन चाये ? पण ई विचार हमारो समाज करतो दिसायेनी ! कांयी बुद्धिजीवी लोक आपण बुद्धि गहाण मेलन आसे विकृत लोकुर लार घिसाते जारेछ !
ई सारी केयेरो कारण की , सोशियल मीडियापर लारेर कांयी सालेती नाईक साहेबेर बाबतीमा कांयी लोक वल्टी सलटी वाते लखते आरेछ. ये लोक कुण छ येरो विश्लेषण करन देयर गरज छेनी. ये लोक हानु कछ की , नाईक साहेब सत्तापर वेतो चार वाते करगो तो कुंणसो उपकार करगो ? नाईक साहेबेन कतराक दन उदबती बाळोछो ? ओ मनुवादी वेते . आबेर एक ताजी घटना छ की, फेसबुकेपर एक जणा लखमेलो छ की , " वसंतराव नाईक तो बंजारार पुरी वाट लगानाको " . ये मुद्दान लेताणी ये लोकुन समाजे मांईर अस्सल जांगड करन केयमा आयो. तो अनेक लोक थयथयाट करेन लगगे. आसेउन जांगड केणो, येमा गैर कांयी छ ? ये लोकुर अपेक्षा आस छ की , नाईक साहेबेबद्दल हाम कांयी बी बोलियां , लखियां तम मुंडो , आंखी बंद करन बेसो. पण हामनेन जांगड मत को ! आजी ई प्रकरण गरम छ. उ माटी जतलगु जाहिर माफी मांगेनी वतेलगु. ओरो पिछो छुटेवाळो छेनी. लारेर साल मेट्रो सिटीम रामसिंग भानावतजीर जयंती साजरी करेमा आयी . ये कार्यक्रमेर माध्यमेती ये लोक हानु सिद्ध करेरो केविलवाणो प्रकार किदे की , नाईक साहेबेपेक्षा भानावतजी कुं मोठे वेते ! वास्तविक भानावतजी न भानावत करन समाजेम मान्यता देयरो काम नाईक साहेबच तो किदेच. ई काम नाईक साहेब न करते तो ढाडी, ढालिया ये समाजेती आज बी दुरच रेते.ई आंतर कमी करेन नाईक साहेबेर भूमिका काम आयी कोनी कांयी ? आयी विये तो , ई वात ये लोक कुं करन भुलच ? जतरा हेटेर पातळी न जाताणी नाईक साहेबेर अप्रतिष्ठा करतो आये ये लोक आज करतुवणा दिसारेछ . ये लोक आब तो एक नवीन फंडा काढेच. ये लोक कोई कार्यक्रम लिदे तो नाईक साहेबेरो फोटो न मेलता हाटकन सेवाभायाबद्दल कोडीरो आदर श्रद्धा न रेता फक्त सेवाभायारो फोटो मेलरेच. कांयी फोटो तो मेलछ पण नाईक साहेबेबद्दल एक शब्द बोलेनी. कांयी लोक तो आब तिलावतजी न मातेपर वठान उ नाईक साहेबेती कुं मोठे छ ई दखाळेरो बी प्रयत्न कररेच. आसे नाना प्रकारेती नाईक साहेबेर अप्रतिष्ठा आपणी जातेर कांयी लोक करतु दिसारेछ. ई समाजेसारु घातक प्रकार छ . आज दस लोक छ . सवार सो विये . सोयेर हजार विये. करन आसे लोकुसामु दुर्लक्ष कोई न करेन चाये . आसे विकृत मनोवृतीर लोकुरो इलाज करेर गरज समाजेन का न वाटेन चाये ? मारो समाज एक सन्मानित जीवन जगेन चाये करन , समाजेन डुंगर खोळा मांईती काढन मोठमोठे शहरेम नाईक साहेब बसारे ई उनुर चुक वेगी कांयी ? हमारे समाजेन अंधारे मांईती वजाळेम लाये ई उनुर चुक वेगी कांयी ? मुठ्ठीभर लोक लाखो लोकुर श्रद्धा, प्रेरणास्थानेन बदनाम करेर मोहिम रबारेछ ई ये लोकुरो खेळ हिजडा वेन समाज कतराकर दन देखेवाळो छ ?आब ई प्रकार मातेर उपरेरो वेगोछ. ये सारी वातेती समाजे मांईरो मोठो वर्ग अनभिज्ञ छ. समाजेम आसो कांयी घडरो वेणो येरेउपर केरी विश्वास बेसं कोनी , पण ई सूर्य प्रकाशेनाई सत्य छ. जे लोकुन वाटछ की , मारो आजेरो अस्तित्व नाईक साहेबे कारण छ. ओ लोक जागे छ. करन ये प्रवृतीर लोक वगाडे पडरेच.
आसे विकृत लोकुरो भेजो भार काढणो इच एक पर्याय आब उरगोच . ये लोकुरो इलाज येच मार्गेती वेयन चाये. नाईक साहेबेर अप्रतिष्ठा करेवाळ लोकुसामु आब दुर्लक्ष करणो कत बेईमानीरो , कृतघ्नपणेरो परिचय देणो छ. ये विकृत भेजावाळ लोकुन एकच केणो छ की , *तम केन बाप मानणु ई तमारो प्रश्न छ. पण हमारो बाप फक्त आणि फक्त वसंतराव नाईक साहेबच छ. करन नाईक साहेबेन न मानेर वियेतो तम मत मानो ,पण नाईक साहेबेर अप्रतिष्ठा करेरो पागलपणो येर आंग मत करजो ! आबेलगु समाज तमारेसामु दुर्लक्ष किदोच. आंग बी दुर्लक्ष करीये ई अपेक्षा मत रखाडजो !*
*हमार भूमिका केरी ऊपर नाईक साहेब थोपेर छेनी. लोकशाही छ तो हाम केरी स्वतंत्र्यपर बोझा लादानी. नाईक साहेबेन मानणु , न मानणु जेरो ओरो प्रश्न छ. पण जे प्रकारेती कांयी लोक नाईक साहेबेन कमी लेखेर षडयंत्र रचमेले छ. ओन हमारो तीव्र आक्षेप छ. प्रश्न बळजबरी केरी गळेपर छरी मेलन नाईक साहेबेन मानेन लगाडेरो छेनी. प्रश्न नाईक साहेबेर बदनामी करेरो, उनुन कमी लेखेरो, उनुर अप्रतिष्ठा करेरो, समाजेरे मनेमांईती कुं करन ओ उतरे आसो खोडसाळ अपप्रचार करेरो. ये घाणेरडे प्रकार घडरेछ ओन तीव्र विरोध आणि आक्षेप छ*
कोई किये की, चार दि नादान लोक विये तो आसेउन महत्व न देयेन चाये. ई वात बी खर छ. पण जसो - पिकेपर चार दि आळी पडगी आन ओर सामु दुर्लक्ष किदे तो सारी पिकेरो सत्यानाश करछ. वसोच ई प्रकार छ. आज आपण आसे लोकु सामु दुर्लक्ष किदे तो ये लोक सवार नाईक साहेबेबद्दल वल्टो सलटो कांयी बी लखन पुस्तक छापताणी समाजेम वेटे लागे तो आयेवाळ नवीन पीढी नाईक साहेबेन कुणशी नजरेती देखीये. येरो गंभीर विचार आज न किदे तो ओर परिणामेन हामच जबाबदार रिंया. करन आसे विकृत प्रवृतीर लोकुसामु दुर्लक्ष न करता उनुन योग्य शिक्षा समाज देयेनच चाये.
नाईक साहेबेर विचारधारापर चर्चा करतुवणा ये वाते समाजेसमोर आणो गरजेरो वेतो करन आत ये वाते स्पष्ट मांडेम आयीछ. कारण आसो छ की, आसे छुपे रुस्तुम वगाडे पडणो स्वस्थ, निरोगी समाजेसारु आवश्यक छ. शेवटी केयेरो तात्पर्य आतराच छ की, आपण सारी एके लोईर छा. ऊ लोई आपापसेम माथाफोडी करन वाया न जायेन चाये. उ समाजेर कामेन आयेन चाये. ई विषय अतिशय संवेदनशील छ. ये विषयेन लेताणी सवार समाजेरो वातावरण गढुळ न वेयन चाये. कारण नाईक साहेबेती समाजेरी भावना जुडी हुई छ. करन समाज भावना धेनेम लेताणी भविष्यम आसे घाणेरडे प्रकार करन कोई आपणी दुर्बुद्धिरो परिचय न देणो. आतरी एक रास्त अपेक्षा नाईक साहेब द्वेषी लोकु सामुती छ. ई अपेक्षा व्यक्त करेरो कारण आसो छ की, आयेवाळे काळेमा समाजेम तनाव निर्माण न वेणु ई ओर लारेर भावना छ.
*कांयी छ नाईक साहेबेर विचारधारा ?*
------------------------------------------------
५ डिसेंबर १९६३ न वसंतराव नाईक साहेब मुख्यमंत्री करन शपथ लिदे जना अनेक प्रस्थापित पुढारीर निंद वडगीती. ओ मुख्यमंत्री वियेते जना भले भले विद्वान चक्रा गेते . तथाकथित उच्च वर्गीय बुद्धिजीवी राजकीय विश्लेषक, पत्रकार लोक उनुन यशवंतराव चव्हाण येनुरे हाते हेटेरो बाहुला करन काम करीये आसो अंदाज बांधेते.पण नाईक साहेब सारी लोकुर अंदाज खोटे ठरान स्वतार वेगळी छाप देशेर राजकारणेम आन समाजकारणेम पाडे. नाईक साहेबेरे स्वभावेम, रोखठोक आन स्पष्ट विचारेम, धोरणेम , कार्यशैलीम लोकुर मन जितेर जी कल्पनातीत शक्ती वेती ओरे कारण स्वकीय आन भारेर विरोधकेन पुरन उरेरो , लोकुरे मनेमा भरायेरो ये सारी वातेरो राज उनुरे स्वभावेम आन विचारधाराम दडरोच.
११ सालेपेक्षा जास्त काळ ओ राज किदे . एक तांडेरो मनक्या ११ साल राज करणु ई कोई साधी वात छेनी. येरो कारण कतो उनुर स्वभावेमांईर लिनता, मृदुता, शत्रुन बी मित्र बणायेरो गुण. विशेष कतो उनुर स्पष्ट विचारधारा. नाईक साहेब राष्ट्रभक्तीपर बोलतुवणा केमेलेछ की, छेळीरो दुध पियेती, जेलेम जायेती, सुत कातेती राष्ट्रभक्ती न ठरेन चाये , उ कामेपरेन ठरेन चाये. करन उनुरो प्रामाणिकपणेती कामेपर जास्त भर वेतो . येरे उपरेती उनुर विचारेर धार कळछ.
वसंतराव नाईक साहेबेन महात्मा फुले , डॉ.बाबासाहेब आंबेडकर किंवा राजर्षी शाहू महाराज मालम कोनी वेते हानु तो कोई के सकेनी. से मालम रेयर बाद बी नाईक साहेब स्वत:र डिलेपर पुरोगामीपणेरो लेबन लगान म घणो मोठो पुरोगामी छु ई वतायेरो काम चुकनही ओ किदे कोनी. काम तो परिवर्तनेरोच किदे. खरी पुरोगामीे विचारधारापरच उनुर कार्य पद्धती वेती. पण पुरोगामीपणो वताते फरे कोनी. दिखावटीपणेरो उनुन तिटकारा वेतो. ई खास उनुर विचारेरो अर्क छ. दुसर वात कतो ओ कुणशी जातेर विरोधेमा किंवा धर्मेर विरोधेमा भूमिका लेताणी ओमा अनावश्यक शक्ती खर्च किदे कोनी. तीसर वात कतो , जीवणेम कतराई संकट आये तरीही न घबराता ओन हिंमतेती सामोरे जान ओमाईती वाट काढन आंग बढेरो. उदाहरण देयरो कतो- १९६७ रो कोयना भूकंप आणि १९७२- ७३ रो भीषण दुष्काळे मांईती जे ताकदेती महाराष्ट्रेन ओ सावरे ओन तोड छेनी. चौथ वात कतो निरर्थक वातेमा आपणो किमती वेळ वाया न घालता , आपणो आर्थिक, सामाजिक, शैक्षणिक विकास कुं करन विये येरे ऊपर जोर देताणी पुरी ताकदेती मेहनत करन आंग जायेरो. केरी मेहरबानीरो बोझा आपणेपर आयेदेर छेनी. हामारो कष्टकरी समाज छ. येरो परिचय देते आंग बढेरो. परिस्थितीरो भांडवल करन हात बांधन बेसेर छेनी. प्रत्येक बिकट परिस्थिपर मार्ग छ , उ ढुंडते जायेरो. प्रत्यक्ष - अप्रत्यक्ष ओ ई संदेश हमारे समाजेन दिनेछ की, पुरोगामीपणेरो बेगडी रुप लेताणी कोई जात ,धर्मेन गाळी देयेमा , लिखाण करेमा शक्ती न खर्च करता समाजेन शक्तिशाली बणायेरो विचार करो , उ विचार कृतीम वतारो , बुद्धिरो योग्य वापर करन वादविवादेती दूर रेताणी समाजेरो भलो करो. ई लाख मोलेरो संदेश नाईक साहेब आपणे व्यवहारेर मार्फत हामनेन दिनेछ. ये वातेसामु आबेलगु हाम दुर्लक्ष करते आयेछा. पर जातेन, धर्मेन गाळी देयेती समाजेरो भलो वेयनी ई मालम रेयर बाद बी हाम हमार शक्ती निरर्थक विवादास्पद विषयेपर खर्च कररेछा.ये सारी वातेती हमारो समाज जतरा दूर रिये वतरा हमारो समाज उन्नतीर, प्रगतीर मोठे शिखर गाठिये . ई वात हाम भुलगे छा.करन नाईक साहेबेन आणि उनुर कृतिशील विचारेन समझन लेणु काळेर गरज छ.
*थोडक्याम वसंतराव नाईक साहेबेर विचारधारारो अर्क आसो छ -*
*१. कोई जाते धर्मेती अकारण दुश्मनी मोल मत लो.*
*२. कोई जाते धर्मेवाळ लोकुन गाळी देयमा , ठालीपाली वाते लखेमा वेळ न गमावता . बुद्धिरो योग्य वापर करन , निरर्थक वादविवादेती दूर रेताणी आपणो भलो कुं विये , आपणो आर्थिक , सामाजिक, शैक्षणिक विकास कुं विये , येरे ऊपर धेन देताणी लक्ष्य साध्य करते जावो.*
*३. जीवणेम अायेवाळी प्रत्येक परिस्थिपर हिंमतेती विजय मळान आंग बढते जावो.*
*४. एकीतो रो . संघटीत रेयेरो शिको.*
*५. बदल स्विकारते जगेबरोबर चालो. रुढी परंपरांन जास्त कवटाळन मत बेसो.*
*६. स्वाभिमानेती जगो. लाचार मत बणो.*
*७. आपसी लढाई झगडा कम करो. आपसे मांईरो संघर्ष टाळो .*
*८. व्यसनेम पिसा बरबाद मत करो.व्यसनमुक्त समाज बणावो.*
*९. एकदुसरेन बळ देते चालो. एकदूसरेर शत्रु मत बणो.*
*१०. छेनी वतं निरर्थक शक्ती खर्च मत करो. दिशाती भटको मत. बेगडीपणो टाळो . कोई लेबलेन महत्व देयेपेक्षा कामेन महत्व दो.*
*११. कोई पर समाजेन, जातेन, धर्मेन दोष देते बेसेती समाजेर उन्नती वेयेवाळ छेनी , तो आयेवाळ प्रत्येक संधीरो सोनो करेतीच समाजेर उन्नती वेयेवाळ छ. येरे ऊपर धेन देन काम करो.*
*आसो समाजेन पोषक अर्क वसंतराव नाईक साहेबेर विचारधाराती निकळछ. इच समाजेन तारेवाळो छ. बाकी कोई बेगडी लेबल हमार कामेर छेनी. जसो - हांळणी कन कस्तुरी रेयर बाद बी उ , कस्तुरीरे सुंगधे सारु रानोमाळ धासच. वसच हमार गत वेगीछ. हमारे कन हमारो शक्तिशाली विचारधन रेयर बाद बी हाम दुसरेर गुलाम वेन भटकरे छा !*
वसंतराव नाईक साहेबेर असे समाज उन्नतीर विचार हाम स्विकारे आणि आपणी बुद्धिरो सदुपयोग किदे तो समाज एके वेगळी उंचीपर जायेशिवाय रेयेवाळो छेनी.
सामाजिक भान रखाडन कुणसे बी क्षेत्रेम काम करेर ऊर्जा नाईक साहेबेर विचारेती निश्चितपणे मळछ. आजेर बिकट परिस्थिती देखता नाईक साहेबेर निर्विवाद विचारधारारी वाटेती जायेमाच समाजेरो भलो छ . फक्त गरज छ गंभीरपणेती, आछी भावनाती नाईक साहेबेन समझन लेयर. समाजेम बुद्धिजीवी कमी छेनी. सेरी बुद्धिरो योग्य उपयोग समाजेन वेयन चाये. से वादविवादेन गाडन समाजेर उन्नतीसारु कांयी करतो आये ? येरो नियोजन, आखणी, मांडणी नाईक साहेबेर विचारधारारो धागा पकडन कती तरी वेयन चाये.
दनेती दन हमारी संवेदना मरती जारीछ. केरीच केती लेणो देणो छेनी आसो आपण सारी वागरेचा. टकडा टकडाम हाम जतं लगु रिंया वतेलगु हमारे पदरेमा कांईच पडेवाळो छेनी. करन समाजेन कती तरी एक झेंडा हेट आणु पडिये. नाईक साहेबेर विचारधारारे झेंडाशिवाय समाजेन दुसरो कुंणसोच सशक्त पर्याय छेनी. करन समाजेम ये विचारेपर शुद्ध भावना लेताणी जागोजागी खल वेयन चाये. ये विचारेपर दीर्घ मोहिम समाजेम जागोजाग रबायेन चाये.
आवो १ जुलैन से भळन समाजहीतेसारु सोगन ला .आपणे श्रद्धा , प्रेरणास्थानेन समझन लेताणी समाजेर मजबूत बांधणी करन, समाजेन न्याय मळान देयर प्रभावशाली शक्ती निर्माण करन करा. *म* पणेन गाडा , *आपण* ये शब्देन बळ देयरो काम प्रामाणिकपणेती करा. कारण समाज काल वेतो ,आज बी छ, आन सवार बी रेयेवाळो छ.
आपणेपेक्षा समाज मोठो छ. स्वतान मोठो बणायेर भानगडीम न पडता , नाईक साहेबेर विचारधारापर समाजेन मोठो करेरो संकल्प करा.
जयसेवालाल । जय वसंत ।।
- फुलसिंग जाधव औरंगाबाद.
मो. ८९९९०९८२६५
============================
