गोरबोलीन जागतिक दर्जाप पुचायवाळो गोरबोली अभ्यासक, साहित्यिक भिमणीपुत्र मोहन नायक
... शब्दांकन...किशोर आत्माराम नायक
🌄🌄🌄🌄🌄🌄🌄🌄🌄🌄🌄🌄🌄🌄🌄
आज जगेर पुटेप नाळी नाळी देशेम, प्रांतेम गोरबोली बोलेवाळ गोरमाटी वसरेच. हजारो सालेती आपणी बोलीन संबाळन आजेलग रकाड मेलेच. भक्कम सी बोलीभाषा लुप्त वेगी, वा वोर अस्तित्व नष्ट वेयेम जमा छ. काम्पुटर, मोबाईलेर जमानो आवगो जू बोलीभाषा जतन करणो कटीन वेगोच. लकणी लकेवाळ याडीबोलीन जतन करेर ऐवजी दुसरी भाषाम बोलणो लकणो येन अभिमानेर वात समजेन लगगेच. छच्यारून घर बोलेर वणा मराठी, हिंदी, इंग्रजी आसी नाळीनाळी भाषार वापर कररेच.गोरबोलीम बोलणो हलकेपणेर समजेलाग. लकणी लकन नोकरी, धंदेप लागेहुये गोर गोरबोलीतीच टाळो खायलाग. लारेर विस, पच्चीस सालेम गोरबोलीर बोलेवाळेर प्रमाण झपाटेती कयी वेयलागो.
आसे वकतेम गोरबोली बचायसारू मकते गोर वेराणू झटेलाग. गोर बोली टिकणो करन बोलेलाग, लकेलाग वोरयेती आयेवाळे काळेम गोरून गोरबोलीर मत्व कळेलागो. नवीपिडीर चेतना जागेलाग. " दूर थे जब डुंगर थे, आब हुई जाण पछाण , सगाती सगा मळगे ....." क जू वारसेक खोड, पालवा गोरबोलीम बोलेलाग लकेलाग.
गोरबोली र वात जनाबी निकळीय जना एक नाम आयेवाळी पिडीन सदा वाट वताळतो रीय उ मंजे...
................................ भिमणीपुत्र मोहन नायक
गोरबोलीन वजाळेम लान, जगेर कानाकोपराम पुचायेर काम ये वेराणूर हातेती घडतो आयोच. गोरबोली आजेताणी तांडेमच बोलतेते. हजारो सालेती हामार बाप-दादा, याडी-भेन वायार गीद, वाजणा, होळीर लेंगी, टेर,ढावलो, तीजेर गीद, सण तेवारेम बोलताणी टकान रकाड मेलीच. पण आयेवाळे समीयाम ओन जतन करणो घणो गरजेर छ. भिमणीपुत्र बापू याडीबोलीन जतन करेसारूच कोशीस कोणी किदो, तो गोरबोलीम जपरे जे भाषा सौंदर्येर सोजा लेन याडीबोली दनीयामाईर दुसरी भाषाऊती कती कमी छेई उ वजाळेम लायेर काम कररोच.
" गोरमाटी बोलीभाषा आणि संकेत " पुस्तक लकन गोरबोलीर शब्दसामर्थ , ओमाईर नाळीनाळी रस, अलंकारेर सोजा लेन गोरबोलीर वैभवशाली शब्दभांडार, ओर ताकद दकाळेर काम किदोच.
" वाते मुंगा मोलेरी" माई गीद , वाजणा, लेंगी, कसळात येमाईर शब्देशब्देर उकल, फोड करन दकाळमेलोच. आयेवाळी पिढीन गोरबोली कुणसी भाषाती कमी छेई तो इतर भाषापेक्षा समृद्ध छ. इ वात हुंडयांग लायेर काम भिमणीपुत्र करमेलोच.
" गोरमाटी बोलीभाषेचे सामाजिक आविष्कार आणि लोकजीवन" ... इ पुस्तक लकन सिद्ध करणाको की गोरबोली व्याकरणेर डिलेती कतीच कमी छेनी. व्याकरणेर अभ्यासकेन दकाळ दिनो की, गोरबोलीम अलंकार, रस, भाषा सौंदर्य, म्हणी, वाक्प्रचार, समास, विभक्ती आसे जे बी घटक छ ओ अस्तित्वेम छ. गोरबोलीम लकेवाळेन, बोलेवाळेन, विचार मांडेवाळेन सदा वाट वतायेर कारया करतो आयेच.
गोरबोलीन राजकीय भाषार दर्जा मळीचाय करन पंतप्रधान, राष्ट्रपती ताणू पत्रव्यवहार करतो आरोच. गोरबोली बदल ओंदूर जीवाळो दकान पडच. आज न आजेर दनेप गोरबोली न राजकीय दर्जा मळयीच. जना बी दर्जा सरकारेसामुती मळीर जना ओत पेलो नाम, पेलो हारद से भिमणीपुत्रेनच करीय.
" क्रांतिसिंह सेवादास तोडावाळो, मारोणी, गोरपान , नसाबी, लावण पिवसी, वाते मुंगा मोलेरी, काकडवांदा, अनवाल,थु: पेल आसी लकणीमाईती गोरबोलीन जीवतो रकाडेर काम करतो आयोच. आजेर समयेम लकेवाळ, बोलेवाळ भकम तयार वेगेच, से आचो लकरेच. जुने वातेर सोजा लेन वापरेम लारेच. आयेवाळे समीयाम गोरबोलीन नक्कीच आचे दन आय.
आज नायक बापूर जलमदन... गोरबोलीम बोलेवाळो, लकेवाळो, जगेवाळो. शब्देशब्देर सोजा लेन ओर फोड करन दकाळेवाळो. येच वातेर विचार करन याडीकार, डॉ. सुभाष राठोड, गणेश करमठोट आसे घणे लोकूर केणो छ. भिमणीपुत्रेर जलमदन " गोरबोली भाषा दन" करन मनायेन चावच. दमाळ प्रकाशनेवाळ कामी बी लागगेच ओंदूर मनेकनती धन्यवाद.
आयेवाळे काळेम "२ एप्रिल" ई दन नक्कीच सारी दनीयाम " गोरबोली भाषा दन" करन मनायेम आर आस आसा करुचू.
याडी सगळती भिमणीपुत्र बापू न वजी याडीबोलीन वजाळेम लायेर ताकद द... आस आरदास करुचू
............................... किशोर आत्माराम नायक
🌴🌴🌴🌴🌴🌴🌴🌴🌴🌴🌴🌴🌴🌴🌴🌴
