नाईक साहेबेरो गुन्हो कांयी ?*

*महानायक वसंतराव नाईक साहेबेर अप्रतिष्ठा करेवाळ लोकुपर सामाजिक बहिष्कार का न नाकेन चाये ?*

   - फुलसिंग जाधव, छत्रपती संभाजीनगर

=====================

*(विशेष विनंती - लेख थोडा मोठो छ. तरीही न चुकता पुरो वाचजो. ओर बादच प्रतिक्रिया दिजो. न वाचता प्रतिक्रिया मत दिजो🙏 )*

----------------------------

*नाईक साहेबेरो गुन्हो कांयी ?*

   जो समाज जन्मजात गुन्हेगार केरावतोतो. जे समाजेन कुंणसोच सामाजिक स्थान कोनी वेतो. ओ समाजेरो एक तरुण स्वत:र ताकदेपर उपमंत्री ते मुख्यमंत्री तोणी झेप लछ. आणि भारतीय राजकारणेम स्वतःरो विशेष स्थान निर्माण करछ. मुख्यमंत्री पदेपर जायेर बाद गोरगरीबेरे जीवणे मांईरो अंधारो दूर करेसारु वेगवेगळी योजना रबावछ. आणि उनुन एक सामाजिक दर्जा निर्माण करन दछ. महाराष्ट्र राज्येन समृद्धिसामु लेजान देशेम नाम करछ. लोकशाही आन लोकशाहीर मूल्य जपन देशेम एक आगळो आदर्श निर्माण करछ. कोरीकोर उनुर सामु एक वेगळी आदर भावनाती देखछ. उनुर कार्येर भरभरन कौतुक करछ. पण हमारे समाजे मांईर कांही मानसिक रोगी लोकुन नाईक साहेब मुख्यमंत्री विये येरो अभिमान वाटेनी. ई घटना समाजेसारु गौरवेर वाटेनी. करन ये लोक ये - ओ निमतेती नाईक साहेबेन बदनाम करेर मोहिम लारेर कैक सालेती रबावते आवरेछ. हाम मात्र मूकबधिर वेन ये लोकुरे निंदनीय कृत्य सामु वारंवार दुर्लक्ष करते आवरे छा. ई मोठ शोकांतिका छ.

*महानायक वसंतराव नाईक साहेबेन बदनाम करेवाळ, उनुर अप्रतिष्ठा करेवाळ लोक कुण छ ?*

नाईक साहेबेन बदनाम करेवाळ आपणे समाजेम चार प्रकारेर लोक छ .

१. नाईक साहेब बौद्ध धर्म का स्विकारो कोनी केयेवाळ.

२. नाईक साहेब अनुसूचित जमातीरो (ST) आरक्षण मळान का दिनो कोनी केयेवाळ.

३. स्वतः पडदालार रेन कांयी सायको स्वभावेर लोकुन आंग करन बरगळेन लगायेवाळ लोक.

४. जेर बापदादार अपेक्षा ई वेती की, नाईक साहेब उनुन सोनेर बंगला बांधन देयेन चावतोतो. पण नाईक साहेब उनुर अपेक्षा पुरी कोनी किदे करन रीस करेवाळ.

   *उपरेर चारीपैकी सारीर मुळ किंवा जड जर दिटे तो उ छ एक (१)नंबर.* एक सुनियोजित षड्यंत्र रचन नाईक साहेबेर अप्रतिष्ठा करेर मोहिम ये लोक प्रत्यक्ष अप्रत्यक्षपणेती लारेर कांही सालेती रबावते आवरेछ. येर कांही उदाहरण आतं देयम आवरेछ.

        कांयी सालेर आंग प्रकाश राठोड(नागपूर)  नामेरो माटी एक पुस्तक लखोतो. ओरो नाम छ, "बंजारा समाज साहित्य आणि संस्कृती".

   प्रकाश राठोड ओर पुस्तकेम साहित्य संस्कृतीपेक्षा नाईक साहेबेर अवहेलना आणि उनुन कमी लेखेरो लिखान अधिक करमेलोछ. एक जाग ऊ हानु लखमेलेछ की, " नाईक साहेबांना आंबेडकर कळण्याआधी सेवालाल महाराज कळणे आवश्यक होते. त्यांना सेवालाल महाराज कळले असते तर त्यांना बुद्धाचे तत्त्वज्ञान कळले असते." ये जाग ई माटी सरळसरळ नाईक साहेबेन अज्ञानी, अडाणी  ठरामेलोच. नाईक साहेब मुख्यमंत्री वेते जना उनुन आंबेडकर किंवा बुद्ध तत्त्वज्ञान समजन लेयेपेक्षा तांडो आणि तांडेर वेला समज लेणो खुप गरजेरो वाटो. ई वात नाम प्रकाश पण जेरे जीवणेम अंधारोच अंधारो छ. ओ प्रकाश राठोडेन कुण समजान क ? नाईक साहेब मुख्यमंत्री वेते जना. मारे समाजेन आज  कसेर गरज छ ? ई ओळखन समाजेर सवारेर पीढिरो विचार करन डुंगरखोळाम आश्रमशाळा, वस्तिगृह सुरु किदे. केवळ स्वतःरो समाज कोनी तो जे जे उपेक्षित छ, वंचित छ उनुर जीवणेमा वजाळो पडीये आसी योजना ओ रबाये. नाईक साहेबेर ई दूरदर्शिता कोई तत्त्वज्ञानेपेक्षा कमी छेनी. "बुद्ध तत्त्वज्ञान हानु केयनी की, तमारे समोर भुको, नंगो समाज देखेर बाद भी तम मारो तत्त्वज्ञान स्विकारो. फक्त मारेच तत्त्वज्ञानेम डुबो. कोई भुखे तरसेरो विचारच मत करो."

   प्रकाश राठोड आंग हानु लखच की, "१९५६ साली नाईकसाहेब आपल्या तमाम बंजारा बांधवासह धम्मात गेले असते तर बंजारा जमातीची ... वैचारीक कुस बदलली असती. ही खंत व्यक्त करतांना दिगंबर राठोड म्हणतात, "त्यावेळी आम्ही धर्मांतरण केले असते तर आज बंजारा समाजाचे चित्र वेगळेच राहिले असते." 

     ये लोक समाजेर हितेरो आतरा दूरेरो विचार करछ की ओनं कोई तोड छेनी ! ये लोकुर विचारेपर केरीभी मनेम एक प्रश्न हानु पडछ की,  बुद्ध धम्म वा धर्म ई विज्ञानवादी, निसर्गवादी छ, परिवर्तनवादी छ. ई धर्म स्विकारेर बाद जीवणेम कसेरच कमी पडेनी आसो ये लोकुरो ठाम विश्वास छ, तो ये लोक आबेलगु बुद्ध धम्म का स्विकारे कोनीछ ? का अंधारे मांयी चाचपडरेछ ? " ना इधरके ना उधरके" ई अवस्था उनुर का बणगीछ ? नाईक साहेबेन बुद्ध तत्त्वज्ञान समजान केयवाळ ये लोकुन अधुरो कोनी तो पुरो बुद्व तत्त्वज्ञान कळगोछ. तो आबेलगु ये बुद्ध धम्मेर दीक्षा का लिदे कोनीछ ? जर लेमेले वेणु तो समाजेती का जपाडन रखाड मेलेछ ? आपणो धर्म जपाडन समाजेर दिशाभूल करेरो कारण कांयी ? बुद्ध तत्त्वज्ञान दुसरेन केयरो छेनी. स्वतः ओमा डुबेरो छ. पण "निम हकीम खतरे जान" क जूं ये लोकुर आज अवस्था वेगीछ. आज ये लोकुर गत आस वेगीच की, ये न धड गोरमाटी रेगेछ, न बुद्ध वेगेछ. समाजेम जतराबी नाईक साहेबेर अप्रतिष्ठा करेवाळ कीडा छ, उनुर सारीर उत्पत्ती ये लोकु कनेती वियीछ.

    ये लोकुरो आणि धाटीरो दूरेदूरेती संबंध छेनी. तरीही समाजेम दुफळी निर्माण करेसारु छेनी वसे उनुर माथे मांईर कीडा भार छोडू करछ. करनच उनुन लडी मांइरो संत सेवालाल महाराज चालेनी. नाईक साहेब जसो वेतो वसो चालेनी. करनच ओ सेवालाल महाराजेर विचारेम भेसळ करन समाजेम पेरू करछ. जसो- " केनी भजो मत , केनी पुजो मत" ई वात संत सेवालाल महाराज येनुर कानेम केगे वेणु वसो समाजेम पेरनाकेछ. याडी जगदंबार भक्ती करेवाळ संत सेवाभाया हानु कसेन किये भेना ? कांई निर्बुद्ध लोक आपणे लेखेम, भाषाणेम येरो वापर करेन लगगेछ. समाज कनाइच येनुर चाले ओळखो कोनी. आब तरी सावध वेजावो.

    संत सेवालाल महाराज, महानायक वसंतराव नाईक येनुपर ये लोकुर कोडीर श्रद्धा छेनी. केवळ दिखावो करन ये दोईन उनुरेर माथेम जे कचरो छ, उ कचरो भेळण उनुन उनुरे विचारे सरीखो ऊभो करेर छ. येर सारु ओ आदरेरो नाटक करछ. आज ओ संत सेवाभायान आतरा बटळा नाकेछ की ओर कल्पनासुद्धा करतु आयनी. वसोच उनुन नाईक साहेबेन बटळायेर छ. पण हमार सरीख उनुर दाळ कांई शिजे देरे कोनीछ. करन हामनेन ये - ओ निमतेही बदनाम करु करछ. 

     महानायक वसंतराव नाईक साहेब मानवतारे तत्त्वज्ञानेन विशेष महत्व देन काम करतेते. जगेम मानवतारे तत्त्वज्ञानेपेक्षा दुसरो कोई मोठो तत्त्वज्ञान छेनी. सारी धर्मेरो, तत्त्वज्ञानेरो सार मानवता इच छ. ई तत्त्वज्ञान नाईक साहेब खरे अर्थेती जाण मेलेते. करन उनुन दुसरो कोई तत्त्वज्ञान समजन लेयर गरज कोनी वेती. ई वात ये लोकुन न कळती वेणो तो उ उनुरे बुद्धिरो दोष छ. 

   ई वेगो एक प्रकार आब दुसरो देखो.

   *नाईक साहेब अनुसूचित जमातीरो आरक्षण मळान दिने कोनी करन खापर फोडेवाळ लोकुर ई छ मानसिकता*

       लारेर मिनाम एक जुनो जातेरो दाखला सोशियल मीडियापर फररोतो. अकोला जिल्हा, वाशिम तालुका मांईर वाई गामेर देवीसिंग चापला चव्हाण येनुर नामेरो उ जातेरो दाखला छ. विशेष कतो ई दाखला अनुसूचित जमाती (ST) प्रवर्गेरो छ. पण ई खरो की खोटो ई केनी मालम छेनी. तरीही ये जातेर दाखलार सत्यता पडताळन न देखता, समाजे मांईर स्वतःन महान सामाजिक चिकित्सक समजेवाळ उतावळे लोक सोशियल मीडियापर अकलेर तारा तोडते तोडते नाईक साहेबेन आरोपी बणा नाके.

     "दमाळ प्रकाशन" नामेरे एक  व्हाट्सएप्प ग्रुपेपर वियी जकोण ई चॅटींग समाजेर दृष्टीती आक्षेपार्हच कोनी तो समाजेर अस्मितापर चोट करेरो ई उघड उघड प्रकार छ. करन ये वाते सामु ऊपर ऊपर न देखेन चाये. ई एक गंभीर वात छ. नाईक साहेबेन कमी लेखेर संधी लोक कुं ढूंडच येरो ई प्रमाण छ.

  सोशियल मीडियापरेर जातेरो दाखला समोर रखाडन ओ ग्रुपेपर जे चॅटींग वियी उ आसे प्रकारेर छ -

 *साहित्यिक मोहन नायक(भीमणीपुत्र) हानु लखछ की*-" ३१ ऑगस्ट १९५२ विमुक्त प्रवर्ग घोषित करेम आयो. ओर बाद भी ८ साल बणजारा अनुसूचित जमात ये प्रवर्गेम र."

      ओर आंग स्वतःन टैग करन भीमणीपुत्र हानु लखछ की,  " मध्यप्रदेशेर भटक्या विमुक्तेर नेता मा. सा. कन्नमवार आन महानायक वसंतरावजी नायक साहेब ये महाराष्ट्र राज्येम विलीन वेगेते. *ये नेता का गचप बेटेते ?* ई प्रश्न उपस्थित वच् ." आत भीमणीपुत्र सरळ सरळ नाईक साहेबेन आरोपीर पिंजरा मांई ऊभो करन उनुर नियतेपर प्रश्नचिन्ह उपस्थित किदेछ. नाईक साहेबेन सारी मालम रेयर बाद भी ओ गप्प बेटेते. आसो येरो अर्थ व्हच. 

    *गोर शिवा लावडिया नामेरो कोई तो सरफिरा* मोहन नायक (भीमणीपुत्र) उपर जे मत व्यक्त किदेते ओन टैग करन हानु लखच की, *" समाज जूं सेवालालेरो आंधभक्त छ जूं वसंतरावेर भी वेते आन छ*" ई सायको आत नाईक साहेबेरो "वसंतरावेर" हानु एकेरी उल्लेख करमेलोच. ओर आंग उ कछ की,  "समाजेर लोक तार्किक आन शिक्षित भि कोनी वियो छ."

    "साणेसरता लोक सामाजिक चिकित्सा कीदे की समोरेती गाळी देयरो समाजकार्य कररेछ"

   ये सायको शिवार  आक्षेपार्ह विधानेपर ओन समज देये ऐवजी भीमणीपुत्र ओन टैग करन लखच की, " धन्यवाद शिवा, वात खर छ."

 ई शिवा नामेरो सायको उघड उघड वसंतराव नाईक साहेबेरो एकेरी उल्लेख कररोच, संत सेवालाल महाराज आणि नाईक साहेबेपर श्रद्धा रखाडेवाळ तमाम समाजेन ऊ आंधभक्त केरोछ. भीमणीपुत्र ओन टोके ऐवजी ओन धन्यवाद देन वात खर छ केरेछ !

    ये आतच थांबेनी आंग भीमणीपुत्र हानु लखच की, "१९५३ सालेमं ऑल. इं. बंजारा सेवा संघेरो पेलो अधिवेशन काहा लेयेमं आयो ? येरो भी आतं उलघडो वच् ." सासी महाराष्ट राज्येर बणजारा ये अनुसूचित जमात ये सुचिम र." १९५२ सालेमं विमुक्त ई घोषणा वेयर बाद ई पेच निर्माण हुओ छ. ई दिखाती वात छ.

  ओर आंग सुग्रीव येनुन टैग करन भीमणीपुत्र पुन्हा हानु लखच की,     

   "१९५३ सालेरो दिग्रसेरो ऑ. इं. बं. सेवा संघेरो अधिवेशन ई संशयास्पद छ. ऑ. इं. बं. सेवा संघ ई क्लासिकल बणजारार संघटना सिद्ध वेगी छ"

   *ये लोकुर चॅटींगेरो सारांश आसो छ की*- महाराष्ट्र राज्य मांईर गोरमाटी अनुसूचित जमाती (ST) प्रवर्गेम रेयर बाद भी नाईक साहेब विमुक्त जाती प्रवर्गेम घाल दिने. ओर बरोबरच १९५३ साले मांई वियो जकोण गोरुरो मळाव संशयास्पद छ !

    संशयास्पद छ, कतो "समाजेन धोको देयरो प्रकार वेतो. येन - केन प्रकारे नाईक साहेबेर बदनामी करेरो ई उद्देश ये लोकुर व्हाट्सएप्प चॅटींगे मांयीती स्पष्ट वच." 

   ये लोकुरी बुद्धि मांयीती आसो विष भार पडोछ. आणि उ समाजेर माथेमांयी पेरेरो प्रयत्न करेम आयोछ." ओर कारण ई विषय गंभीर छ.

         वास्तव ई छ की, उ जातेरो दाखला झुम करन दिटेतो बनावट दिसावछ. विशेष कतो ओरे ऊपर तारीख, जावक क्रमांक छेनी. ओर सत्यतापर प्रश्नचिन्ह छ. तरीही ये लोक नाईक साहेबेन दोषी ठरारायेर चुक किदेछ.

     दुसरो आसो की, १९५३ मांयी दिग्रस आत लालबहादुर शास्त्रीजी येनुर उपस्थितीम ऑल इंडिया बंजारा सेवा संघेरो अधिवेशन कोनी वियोतो. ऑल इंडिया बंजारा सेवा संघेरो जन्मच १९९९ सालेरो छ. १९५३ मांयी अधिवेशन कुं करन विये ? दिग्रसेन ३० व ३१ जानेवारी १९५३ मांयी "अखिल भारतीय बंजारा युवक परिषद" वियीती.

  ओच साल "अखिल भारतीय बंजारा सेवा संघ (Akhil Bhartiya Banjara Seva Sangh) (ABBSS) अस्तित्वेम आयो. येर नोंदणी १९८१ मांयी अकोला आतं करेम आयीती. ओरो मुख्यालय औरंगाबाद वेतो. जेरो नोंदणी क्रमांक- 524/1981-1982 (Akola) वेतो. ये संघटनारो गैरपंजीकरणेसहित कार्यकाळ १९५३ ते १९९८ वेतो. ई संघटन १९९९ मांयी अंतर्गत वादावादी वेये कारण बरखास्त करन नवीन संघटन ऊभो करेम आयो. जेर नोंदणी मुंबईम करेम आयीती. ओर नोंदणी क्रमांक- M.S. Mumbai 295-1999-GBBSD and F - 21547(Mumbai) ई छ. आणि ओरो नाम वेतो "ऑल इंडिया बंजारा सेवा संघ" (All India Banjara Seva Sangh) (AIBSS).

 समाजेन खोटी माहिती देन समाजेर मनेमांयी संभ्रम निर्माण करेरो पाप कोई न करेन चाये ! आन आपणे आस्था, श्रद्धास्थानेन बट्टो लगान बदनाम न करेन चाये. ओ काळेर समाजसुधारक निःस्वार्थी वेते. समाजेरो हित समोर रखाडन काम करतेते. आजे सरीख स्वार्थी ओ कोनी वेते. करन उनुर नियतेपर प्रश्नचिन्ह वठाणो कतो आपणी याडीर चरित्रेपर प्रश्नचिन्ह वठायेरो ई प्रकार छ.

*भीमणीपुत्र येनुरो सामाजिक दर्जा*

     मोहन नायक (भीमणीपुत्र) येनुर एक ज्येष्ठ साहित्यिक करन समाजेम उनुरो नाम छ. समाज उनुन खुप ऊंचीपर लेजान बसार मेलोछ. करन उनुर प्रतिष्ठान कती डाग न लागणु ई मार सरीकेर इच्छा छ. पण दुर्दैवेती हानु केणो पडरोच की, चुकीर लोकुर नादी लागन जे कमाई ओ किदेछ. उ कमाई उनुर हातेती गमायेर लार लागरेछ हानु केणो चुकीरो छेनी. समाज सहज केनी ऊपर वठायेनी. जर उ ठरायो तो खुप ऊंचीपर लेजावच आणि चुकीरो कांयी घडगो तो वतराच वेगेती जमीनेपर लान पटक भी दछ. ई वात भीमणीपुत्र येनुन न भुलेन चाये.

   आपण कांयी लखरेछा ? ओरो समाजेर मनेपर कांयी परिणाम वच ? आपणेच श्रद्धा स्थानेपर आपण घाव तो कोनी घालरे ? येर काळजी सेनंच लेयेन चाये. आपणे घरेपर हातोडा मारणो. येनं सामाजिक चिकित्सा करणो केयनी. येनं पागलपणो कछ. ई पागलपणो शिवा नामेरो सायको लारेर कांयी सालेती कररोछ. समाजेन ओरे पागलपणेसारु आज न तो सवार औषध ढुंडणु पडीये.

   *येनुर लायकी कांयी ?*

   प्रकाश राठोड, दिगंबर राठोड, शिवा सारखे अनेक विकृत मानसिकतार लोकुन नाईक साहेबेर कार्येर समीक्षा करेर पात्रता किंवा लायकी तरी छ कांयी ? ई शिवा आजच कोनी तो लारेर कांई सालेली संत सेवालाल महाराज, महानायक वसंतराव नाईक साहेबेपर सतत चिखलफेल करु करछ. आणि ओन भीमणीपुत्रेसरीख खतपाणी घालू करछ. ओती ओन जास्त बळ मळछ. नाईक साहेबेर प्रतिमा खराब करेवाळ एक टोळी लारेर कांही सालेती सक्रिय छ. जे टोळीन गिधाड टोळी केणो सार्थक विये. गिधाडेन जसो सडको मांस आवडछ. वसोच ये लोक सडको भेजो लेन समाजेर आस्था स्थानेपर सतत घाव घालते रछ.       

    १४० कोटीर देशे मांई इतर कोई जातेम आसे नीच लोक कोनी वेणो, जे आपणेच श्रद्धा स्थानेपर घाव घालन ओन इतर समाजेसमोर बदनाम करन मेलते वेणु. मराठा समाजेरो लारेर कांई सालेती आरक्षणे सारु आंदोलन चालू छ. पण एक भी कार्यकर्ता किंवा उनुरे समाजेरो नेतृत्व करेवाळ नेता माजी मुख्यमंत्री व संरक्षणमंत्री यशवंतराव चव्हाण साहेबेती तो सध्यार मुख्यमंत्री एकनाथ शिंदेन दोष देतु दिसायनी. एकनाथ शिंदे मुख्यमंत्री रेयर बाद भी ओन छोडन उपमुख्यमंत्री देवेंद्र फडवणीस येनं टार्गेट कररेछ. येनं जातेरो स्वाभिमान आन आपणे नेतारे ऊपर डाग न लागे देयर धोरण कछ. हमारे समाजेर नीच प्रवृतीर लोक सतत हमार श्रद्धा स्थानेपर घाव घालेर भूमिका पार पाडरेछ. ये मुर्खेऊन कोई के तो ओ एकेरी भाषाम हानु कछ की, "हाम सेवालालेर, वसंतरावेर" सामाजिक चिकित्सा न करणु कांयी ? 

   एखादी वेंडेरो वेंडोपणो समाजेन घातक ठरतो वेणो तो ओरे वेंडेपणे सामु कतराक दन दुर्लक्ष करेन चाये ? जे जे लोक स्वतःन फार मोठे परिवर्तनवादी मानन समाजेर आस्था, श्रद्धापर वारंवार घाव घालते आवरेछ. उनुरो इलाज करेर दन आब आवगेछ.     

    स्वतःन जागतिक पातळीपरेर सामाजिक चिकित्सक समजेवाळ लोकुन मारो प्रश्न छ की, *तम आतरा महान सामाजिक चिकित्सक छो तो जरा येर बी चिकित्सा करो* -

१. जर ये राज्येरो मुख्यमंत्री नाईक साहेब न रे वेते तो-  आज हमार समाजेर  सामाजिक, शैक्षणिक, राजकीय प्रगती वेमेलीछ उ वेती कांयी ? 

२. महाराष्ट्र राज्येम आज आपणे समाजेरो जे स्टैटस छ. उ नाईक साहेब मुख्यमंत्री न वेते तो उ हामनेन मळतो कांयी ?  

३. नाईक साहेब मुख्यमंत्री वेयेर बाद डुंगरखोळा मांयी आश्रमशाळा, वस्तिगृह न देते तो  तांडेपरेर छिच्यापर शिक्षण लेते कांयी ? 

   ४. शिक्षणेर दरवाजाच बंद रे वेते तो हमारो समाज आज कतं रेतो ?

५. नाईक साहेबे कारण हमारो समाज शैक्षणिक व सामाजिकदृष्ट्या सदरो की लारो चलेगो ? 

६. साइमन कमीशनेसमोर १८७१ रेरो जन्मजात गुन्हेगार ठरायेवाळ कायदेर बळी पडेपडाय समाजेन मतदानेरो हक्क न देणु करन कुण को ? 

७. देशेरो संविधान निर्माण करेसारु तीनशे सदस्येर समिती वेती. ओ तीनशे पैकी एक जरी सदस्य १८७१ रेर काळे कायदेरो बळी रो वेतो, तो उ संविधान लखतो कांयी ? किंवा दुसर कोई लखे वेते तो ओ लागू वेये देते कांयी ?

           असे कैक प्रश्न छ. उनुर समीक्षा कनाई तो ये लोक करेन चाये. 

         *....ओ जातेर दाखलार सत्यता कांयी ?*

    ६ सप्टेंबर १९५० रेर भारत सरकारेर गॅजेट (राजपत्र) मांई तत्कालील बॉम्बे स्टेटम अनुसूचित जमातीर यादीत एकूण २४ जाते वेती. ओमा नायकडा जातेरो समावेश वेतो. २० सप्टेंबर १९७६ रेर भारत सरकारेर गॅजेट (राजपत्र) मांई महाराष्ट्र राज्येम अनुसूचित जमातीर यादीत एकूण ४७ जाते वेती.

१९५० आणि १९७६ रेर राजपत्रेम कांही राज्येर बंजारा समाज अनुसूचित जमाती प्रवर्गेम समावेश वेतो.

       १९५० आणि १९७६ रेर गॅजेटेम महाराष्ट्र राज्येर बंजारा समाजेरो अनुसूचित जमाती यादीम समावेश छेनी. पछ कुंणसो कार्यालय यादीम नाम न रेता ST रो प्रमाणपत्र दे सकछ ? बना तारखेरो, बना जावक क्रमांकेरो दाखला देयम आवछ कांई ? वाशिम तालुका मांई एकच गोरमाटी वेतो कांई ? असे कांही प्रश्न उपस्थित व्हच. कोई वातेर शहानिशा न करता एकदम नाईक साहेबेन आरोपीर पिंजरा मांई ऊभो करन उनुन दोषी ठरायरो पाप ये लोक सोशियल मिडियापर किदेछ.

          खरो तो ये लोकुन ई विचार करेन चावतोतो की नाईक साहेबेरो वाढतो राजकीय प्रभाव केनं केनं अडचणीरो वाटतोतो ? कुंणसे लोकुन उनुरो डर वेतो की, नाईक साहेबेरो वाढतो प्रभाव उनुर  राजकीय अस्तित्व धोकेम ला सकछ ?  नाईक साहेबेरो राजकीय प्रभाव कमी करे शिवाय आपणो राजकीय अस्तित्व टिकेवाळो छेनी. ई खुनगाठ बांधन उनुन मुख्यमंत्री पदे परेती दूर करेवाळ लोक कुण वेते ? आतराच कोनी तो आपणे समाजेन अनुसूचित जमाती प्रवर्गेम लायर उनुर प्रयत्नेन जगजीवनराम बाबू आडकाठी का घालो ? ओरो स्वार्थ कांयी वेतो ?  जगजीवनराम बाबू इंदिरा गांधीपर दबाव लान लोकसभा मांयी बिल का आये दिनो कोनी ? 

      महाराष्ट्र राज्य मांयीर नाईक साहेबेर समाजेन ST आरक्षण जर मळगो तो ये समाजेर खासदारेर संख्या वाढे आन केंद्रेम नाईक साहेबेरो प्रभाव जास्त बढ जाये. नाईक साहेबेरो केंद्रेम प्रभाव वाढगो तो आपणो महत्व कमी वेजाये येरो डर जगजीवनराम बाबू सरीखे अनेक नेताऊन र. करन ओ आपणेन ST प्रवर्गेम समावेश करेरो बिल ये लोक पास विये दिने कोनी. हामनेन ST रो आरक्षण न मळोरो ई प्रमुख कारण छ. ओर सारु तत्कालीन परिस्थिती, अनुकूलता - प्रतिकूलता ये से वाते अभ्यासेन चावछ. पण नाईक साहेबेर बदनामीर सपारी लेये हुये लोकुन येर गरज वाटेनी.

    जेनं दि वेळेर बाटीर सोय छेनी. नाकापर काम करन पेट भरेवाळ लोकसुद्धा नाईक साहेबेर ऊपर लांछन लगावछ. वामन मेश्रामेर संघटना मांयी काम करेवाळो परभणीरो रविंद्र राठोड नामेरो एक डॉक्टर  नाईक साहेबेर कामेर समीक्षा करेर नामे हेट सोशियल मीडियापर अकलेरो तारा तोडतोतो. ओर भाषा अतिशय हीन दर्जार रेतीती. लार हानुच सोलापुरेरो एक माटी पातळी छोडन सोशियल मीडियापर मनेम आव वसो नाईक साहेबेबद्दल बकमेलोतो. 

    समाजे मांयीर ये सारी गंदी माचळीन आछे अंगारेपर आज न सवार भुजणो पडीये. ये सारी लोक सपारीबाज छ. करनच ओ नाईक साहेबेरो वारंवार अनादर करते रछ.

    एकवडी कोरीकोर नाईक साहेबेरो नाम मिटाये सारु आटोकाट प्रयत्न कररेछ. आणि ओमा हमार जातेर ये जांगड लोक खतपाणी घालरेछ. जे की समाजद्रोह छ. आसे समाजद्रोही लोकुपर सामाजिक बहिष्कार का न घालणु ? ये लोकुरे नीचपणे सामु समाज कतराक दन दुर्लक्ष करेन चाये ? समाज असे दुर्बुद्धिऊन वारंवार जायेदो करन माफ कर दछ. पण ये लोक वेगवेगळे रुप धारण करन आपणे हलकटपणेर परिचय देते आवरेछ.

      संत सेवालाल महाराज आणि महानायक वसंतराव नाईक साहेब ये समाजेर आस्था श्रद्धास्थान छ. ये स्थानेपर घाव घालेवाळ लोकुपर सामाजिक बहिष्कार नाकणो गैर ठरेवाळो छेनी. समाजेन आब गप्प बेसन चालेवाळो छेनी. ये दुर्बुद्धि लोकुर बाबतीम ठोस भूमिका लेणो पडीये. ओर सोबतच ये लोकुन खतपाणी घालेवाळ लोकुरो भी गंभीर विचार करणु पडीये.

दिनांक - ४/८/२०२४

                                   

     *-फुलसिंग जाधव*

    छत्रपती संभाजीनगर                                           

       8999098265

====================